Preface, 1611-08-25, Henricus Smetius to the Reader
| Author: | Henricus Smetius |
| Recipient: | Reader |
| Type: | Preface |
| Date: | 25 August 1611 |
| Place: | no place |
| Pages: | 4 |
| Language: | Latin |
| Quote as: | https://www.theatrum-paracelsicum.com/index.php?curid=2897 |
| Editor: | Edited by Julian Paulus |
| Source: | Henricus Smetius, Miscellanea medica, Frankfurt am Main: Jonas Rosa 1611, sig. ):(3r-):(4v [BP.Varia.1611-01]
|
| Translation: | Raw translation see below |
| Back to Paratexts Back to Texts by Henricus Smetius |
[sig. ):(3r] Lectori benevolo salvtem in Domino nostro Christo Iesu.
Iam inde ab Automno anni 1561. cum post acceptum ab Academia Bononiensi publicum de studiis meis, ætatis ann. 24. nondum completo testimonium, per aliquot menses Antwerpiæ nulli obligatus Medicinam facere aggressus essem: Clarissimi duo doctrinaque præstantes viri, Henricus Brucæus Alostanæ Reipublicæ in Flandria tunc temporis ordinarius Medicus, atque Levinus Battus in celeberrima Rostochiensium Schola Philosophiæ ac Med[icinae] Professor publicus, ambo cognationis jure, & studiorum communione mihi conjuncti, [sig. ):(3v] cæperunt mecum de varia communis artis materia subinde per literas colloqui.
Verum Epistolarum ἐπίγραφα quædam per occupationes alias interciderunt. Nec minus ultrò citroq́ue scribendi officium per bellicas calamitates in Belgis paulò post obortas, adeoq́ue meam, ex intestini belli patriæ impendentis formidine, spontaneam aliò transmigrandi necessitatem, ad tempus est intermissum: dum mihi meisq́ue sedem tranquilam, Deus opt[imus] max[imus] pro benignitate sua paterna, inter Vvestfalos Lemgovij assignasset.
Illic demum resumpto in manus calama, ad mutuas scribendi operas reversi sumus: & quidem majori quam ante sedulitate: cum aliis de rebus, tum verò imprimis de nova Theophrasti Paracelsi Medicina: circa tempus illud, in usum apud quosdam veniente: per quam Galenica nonnullis in locis fastidir cepit. Quo affectu cum Doctor Lev[inus] Battus correptus esset: ipse quoq́ue & mihi, [sig. ):(4r] veteris artis nauseam movere conabatur. Verum ego, qui verisimilibus à proposito dimoveri nunquam assueverim: Firmamenta eius ad rationis trutinam expendere necesse putavi: alternisque ita scriptionib[us] de veteri & nuper nata Medicandi arte, inter nos conferri cœptum: ausu sane juvenili, & quidem triennio antè, quam mihi de Thomæ Erasti Antiparacelsicis certi quicquam constaret. Quamvis autem ad eruditionem Erastinam, ejusdemque in examinandis adversariorum probationibus solertiam, & refutandis judicij acumen, nihil addi posse videam: Nihilominus, ut & ab aliis de tali materia aliquid quondam tentatum fuisse: nostramque ætatem in otio nequaquam diffluxisse congoscatur: Hos literarios conatus, licet tunc per ætatem fortè præmaturos, non tamen, quod speramus, omninò inutiles futuros, à blattarum commercio, post XL. annorum detentionem liberatos, lucem videre publicam permisimus.
Quibis nonnullos clarorum Medi- [sig. ):(4v] corum tractatus, velut adoptivos interseruimus, & quidem duas ob causas, quarum prior, quod sint tanquam responsiones ad Epistolas meas, per quas ipsis talia scribendi occasionem dederam: Altera cum lectu sint dignissimi, ac perquam utiles, ut Lectori ad manus essent, qui fortassis alioquin in obscuro mansuri fuissent, aut sub cupidi Lecotis oculos, haud facilè perventuri. His itaque furere, ac vale.
Præmonitum tamen te volo, Amice Lector, ne operis huius lectioni te accingas prius, quam lapsus operarum incuria commissos, quos fini operis subjunximus, suis quosque locis correxeris: alioquin absona subinde, mentique auctoris dissentanea, præter opinionem occurrerent. Iterum vale 25. August 1611. ætatis meæ in annum LXXV. benignitate Christi Iesu productæ.
Henricus Smetius à Leda.
